औरंगाबाद / प्रतिनिधी,

भारत सरकारने तुमच्या भविष्यनिर्वाह निधीच्या रकमेची संचिका रद्दबातल करण्यासाठी महाराष्ट्र राज्य सरकारमार्फत आमच्या विभागाकडे पाठवली आहे. संचिकेत त्रुटी असल्याने ती रद्द होऊ नये, यासाठी तुम्हाला सव्वातीन लाखाच्या दहा टक्के रक्कम विभागाच्या खात्यावर विनाविलंब भरावी लागणार आहे, असे धमकावत दिल्लीतील दोन महिलांनी महावितरणच्या निवृत्त कनिष्ठ अभियंत्यालाच एक लाख चार हजाराचा गंडा घातल्याचा प्रकार समोर आला आहे. याप्रकरणी पुंडलिकनगर पोलिस ठाण्यात गुन्हा दाखल करण्यात आला आहे.
सिडकोतील रहिवासी चंद्रशेखर दिगंबर दामोधरे (60, रा. एन-3) हे महावितरणमधून कनिष्ठ अभियंता म्हणून निवृत्त झाले आहेत. त्यांना 20 ऑगस्ट 2018 सायंकाळी पाचच्या सुमारास फोनवर दिल्लीतील महिला शनया कौर हिने संपर्क साधला. त्यावेळी तिने पेन्शन फंड रेग्युलेरिटी डेव्हलपमेंट अ‍ॅथोरिटी येथून बोलत आहे. असे सांगत सविस्तर माहिती मागितली. सेवा निवृत्तीबाबत पुर्ण माहिती सांगत महाराष्ट्र शासनाने तुम्हाला भारत सरकारच्या वतीने मिळणारी भविष्य निर्वाहनिधीची रक्कम तीन लाख दहा हजार 648 रुपयांची संचिका राज्य शासनाने रद्द बातल करण्यासाठी आमच्या विभागाकडे आली आहे. या संचिकेत त्रुटी असल्याने ती रद्दबातल होणार आहे. ही संचिका रद्द करावी का ? असे विचारताच तिला दामोधरे यांनी संचिका रद्द करु नका, संचिकेतील त्रुटी काय आहे ते मी पुर्ण करतो असे म्हणाले. त्यावर महिलेने सेवानिवृत्तीची तारीख, तसेच पेन्शन फंड संचिका क्रमांक, पुर्ण नाव व संपुर्ण माहिती तिने सांगितली. त्यामुळे तिच्यावर दामोधरे यांचा विश्‍वास बसला. पुढे तिने संचिका क्रमांक सांगत रक्कम खात्यात भरायची असल्यास मुळ रकमेच्या दहा टक्के रक्कम म्हणजे 31 हजार 64 रुपये विना विलंब भरा. तसेच ही रक्कम आपल्याला परत केली जाईल असे सांगितले. त्यानंतर 23 ऑगस्ट 2018 रोजी आर. टी. जी. एस. व्दारे दामोधरे यांनी विभागाच्या खात्यात रक्कम जमा केली. 4 सप्टेंबर 2018 रोजी पुन्हा स्नेहा सिंग हिने फोन करुन तुमच्या सन 2002 च्या भविष्य निर्वाहनिधीच्या खात्यामध्ये 31 हजार 648 रुपये तसेच 19 हजार पाचशे रुपये आणखी जमा झाले आहेत. दोन्ही रक्कम मिळुन चक्रवाढ व्याजापोटी 80 हजार पाचशे रुपये इतकी रक्कम जमा असल्याचे तिने दामोधरे यांना सांगितले. तसेच तिन्ही रकमांची एकुण रक्कम पाच लाख 81 हजार 648 होत असल्याचे सांगितले. याशिवाय रकमेवर आपणास एक लाख चार हजार 696 रुपये एवढा आयकर भरावा लागणार आहे. पुर्वी भरलेली रक्कम 31 हजार 64 रुपये वजा करुन 73 हजार 632 रुपये आपल्याला खात्यावर भरावी लागणार आहे. असे म्हटल्यावरुन 4 सप्टेंबर 2018 रोजी दामोधरे यांनी पुन्हा बँक खात्यावर आर. टी. जी. एस. व्दारे रक्कम जमा केली.

अन् दामोधरे यांना आला संशय
दामोधरे यांनी पैसे भरल्यानंतर स्नेहा सिंगने दर सोमवारी संपर्क साधून तुमची संचिका मंजुर होत असल्याचे आश्‍वासन दिले. 20 सप्टेंबर 2018 रोजी तिने पुन्हा फोन करुन सांगितले कि, तुमची संचिका मंजुर झाली आहे. परंतू सेवा शुल्कापोटी तुम्हाला आणखी 25 हजार रुपये भरावे लागणार आहे. त्यामुळे दामोधरे यांना संशय आला. त्यांनी पेन्शन फंड रेग्युलेरिटी डेव्हलपमेंट अ‍ॅथोरिटीच्या वेबसाईट तपासणी केली. तेव्हा फसवणूक झाल्याचे त्यांच्या लक्षात आले. तोपर्यंत त्यांना दोन महिलांनी एक लाख चार हजारांना गंडा घातला होता. दामोधरे यांनी रविवारी पोलिसात धाव घेत तक्रार दिली. याप्रकरणाचा पुढील तपास जवाहरनगर पोलिस ठाण्याचे निरीक्षक संतोष पाटील करत आहेत.