ऑस्ट्रेलिया आणि भारतीय संघाची चार सामन्यांची कसोटी मालिका सुरू आहे. भारताविरूद्धच्या चौथ्या आणि शेवटच्या कसोटी सामन्यात ऑस्ट्रेलियाने पहिल्या दिवसअखेर ५ गड्यांच्या मोबदल्यात २७४ धावा केल्या आहे. मार्नस लाबूशेनचे शानदार शतक आणि मॅथ्यू वेडची ४५ धावांची जोरदार खेळी केली आहे. भारताकडून कसोटी पदार्पण करणाऱ्या गोलंदाजांनी अप्रतिम कामगिरी केली. 'यॉर्कर किंग' म्हणजे टी नटराजनने २ बळी घेत कसोटीत शानदार पदार्पण केले आहे. तर, वॉशिंग्टन सुंदरला स्टीव्ह स्मिथच्या रूपात आपला पहिला आंतरराष्ट्रीय कसोटी बळी मिळवला आहे. 
ऑस्ट्रेलियाचा कर्णधार टीम पेनने नाणेफेक जिंकून प्रथम फलंदाजीचा निर्णय घेतला आहे. त्यांच्या सलामीवीरांनी तो निर्णय चुकीचा ठरवत. डेव्हिड वॉर्नर एका धावेवर तर मार्कस हॅरिस ५ धावांवर माघारी परतला. त्यानंतर मार्नस लाबूशेन आणि स्टीव्ह स्मिथ या अनुभवी जोडी यजमानांचा डाव सावरला. या दोघांनी तिसऱ्या विकेटसाठी ७० धावांची भागीदारी केली. स्मिथ ३६ धावांवर बाद झाला. पण लाबूशेनने मॅथ्यू वेडच्या साथीने डाव दोनशेपार पोहोचवले आहे. 
मॅथ्यू वेड आणि लाबूशेन यांच्यात शतकी भागीदारी झाली, पण वेडला अर्धशतक करता आले नाही. ४५ धावांवर तो माघारी परतला. त्याने सहा चौकार ठोकले. त्यानंतर मार्नस लाबूशेनने आपले दमदार शतक पूर्ण केले. आधीच्या सामन्यांमध्ये त्याला शतक करता आलेलं नव्हते, पण या सामन्यात त्याने शतक झळकावले. शतक पूर्ण झाल्यावर फटकेबाजी करताना तो १०८ धावांवर झेलबाद झाला. लाबूशेनने २०४ चेंडू खेळत ९ चौकार खेचले. त्यानंतर कर्णधार टीम पेन आणि कॅमेरॉन ग्रीन या जोडीने दिवसाचा खेळ संपेपर्यंत चांगला खेळ केला. ग्रीन २८ तर पेन ३८ धावांवर नाबाद खेळत आहेत. भारताकडून नटराजनने दोन तर सिराज, सैनी आणि सुंदरने १-१ बळी घेतला आहे.